Si quodlibet dictionarium ad nomen Moyssiacum inquirendum perlegas, hanc breviorem descriptionem invenias :

"MOYSSIACUM (82200) : caput unius e pagis regionis vulgo Tarn-et-Garonne appellatae ad Tarnem situm ; plus duodecim milia incolae (vulgo "Moissagais" appellati) ; uva "Chasselas" nuncupata ; ecclesia XII° et XV° saeculo aedificata, cum portali claro ac Romanico atque claustro figuratis capitulis ornato."

Hoc quidem bene est, immo vero multa et alia dicenda sunt de illa urbe praestanti ob eas causas quod non solum situs ei multas gratias adfert sed etiam eadem antiquis ac pretiosis monumentis abundat.

Condita in radicibus extremorum promunturiorum quae Arverni montes attollunt, MOYSSIACENSIS CIVITAS huic provinciae quae vulgo "Midi-Pyrenees" appellata est atque illi ampliori regioni quae inter solis occasum et meridiem spectat inest. Ducentis chiliometris (sive circiter centum triginta tres milia passuum) abest a Pyrenaeis et Arvernis montibus et Oceano et interno Mari. Praeterea medius locus est illa urbs quo vergunt variae regiones ut pagi Rutenorum et Cadurcorum et Aquitanorum et Vascorum quorum ingenia accepit sibique adsumpsit. Unde fit ut illa parva ac provincialis urbs concordiam serenitatemque praebeat.